புற்றுநோயை தவிர்ப்பதற்காக மார்பகங்கள், கர்ப்பப் பைகளை அகற்றும் சகோதரிகள்

பிரிட்டனைச் சேர்ந்த சகோதரிகள் மூவர் புற்றுநோய்க்குப் பயந்து  தமது மார்புகள் மற்றும் கர்ப்ப்ப பைகளை அகற்றுவதற்குத் தீர்மானித்துள்ளனர்.

லுவான் மோர்டன் (வயது 38), கிம் ஜோன்ஸ் (வயது 33), ஜெம்மா டேன்னிஸ் (வயது 30) ஆகிய இச்சகோதரிகளின்  தாய் ரீட்டா 32 வயதான மார்பக புற்றுநோய் காரணமாக இறந்தார்.

அதையடுத்து இம்மூவரும் தமக்கும் புற்றுநோய் வரலாம் என்ற அச்சத்தில் தமது மார்பகங்களையும் கர்ப்பப் பைகளையும்  அகற்றிக்கொண்டுள்ளனர்.

இவர்களுக்கு கர்ப்பப் புற்று நோய் ஏற்படுவதற்கான சாத்தியக் கூறுகள் 50, 60 சதவீதம் இருப்பதாக வைத்தியர்கள் கூறியதைத் தொடர்ந்து மூத்த சகோதரிகள் இருவரும் கர்ப்பப்பையை அகற்றும் நடவடிக்கையில் ஈடுபட்டனர்.

சகோதரிகளில் இளையவரான ஜெம்மா, தனது கணவனினூடாக குழந்தைகளை பெற்றுக்கொண்டதன் பின்னர் கர்ப்பப்பையை அகற்றும் சகிச்சையை மேற்கொள்ளவாராம்.

இவர்களின் தாய் இறக்கும்போது மூத்தவரான லுவானுக்கு 12 வயது. ஏனைய இருவரும் 7 மற்றும் 4 வயதுடையவர்களாக இருந்தனர். ஏனைய பெண்களும் சோதனைகளை மேற்கொள்ள வேண்டுமென இவர்கள் அறிவுறுத்தியுள்ளனர்.

'எமது தாய் இறந்ததன் பின்னர் நாங்கள் மூவரும் மிகவும் நெருக்கமாக வளர்ந்தோம். ஆனால் இந்த சத்திர சிகிச்சையானது எமது நெருக்கத்தை மேலும் அதிகரித்துள்ளது' என லுவான் மோர்டன் தெரிவித்துள்ளார்.

'நாம் அதிஷ்டசாலிகள். ஏனெனில் எமக்கு புற்றுநோய்க்கு காரணமான அந்த மரபணு உள்ளதென்பதை உணர்ந்து நாம் புற்றுநோய் விருத்தியாவதை தடுப்பதற்கான நடவடிக்கைகளை மேற்கொண்டுள்ளோம்.

ஆபத்தை குறைக்கக்கூடிய விடயங்கள் உள்ளன என்பதை மக்கள் உணரவேண்டும். எமது தாய் அந்த மரபணுவை கொண்டிருந்தார். எனினும் அவர் ஒருபோதும் சோதனை மேற்கொள்ளவில்லை' என அவர் கூறியுள்ளார்.