மதுபோதையில் இருந்தேன்: லூக் பொமர்ஸ்பக்

A.P.Mathan / 2012 மே 21 , பி.ப. 06:14 - 0 - {{hitsCtrl.values.hits}}

கைதுசெய்யப்பட்டுள்ள ரோயல் சலஞ்சர்ஸ் பெங்களூர் அணியின் வீரரும், அவுஸ்ரேலியாவைச் சேர்ந்தவருமான லூக் பொமர்ஸ்பக், தான் மதுபோதையில் காணப்பட்டதை காவல்துறையினரிடம் ஒத்துக் கொண்டுள்ளதாக அறிவிக்கப்பட்டுள்ளது. அத்தோடு இந்தச் சம்பவத்தில் ரோயல் சலஞ்சர்ஸ் பெங்களூர் அணியின் இன்னுமொரு இளைய இந்திய வீரரொருவரும் சம்பந்தப்பட்டுள்ளமை கண்டுபிடிக்கப்பட்டுள்ளது.

குறித்த ஹொட்டலில் பொருத்தப்பட்டிருந்த கமெராக்களை ஆராய்ந்த போது ரோயல் சலஞ்சர்ஸ் அணியின் வீரரான கே.பி.அப்பன்னாவும் குறித்த சம்பவத்தோடு சம்பந்தப்பட்டுள்ளமை கண்டுபிடிக்கப்பட்டுள்ளதாக காவல்துறையினர் தெரிவித்துள்ளனர். லூக் பொமர்ஸ்பக்கோடு இணைந்து அந்த ஹொட்டலில் கே.பி.அப்பன்னாவும் இணைந்து சென்றதை கமெராக்கள் பதிந்துள்ளதாக காவல்துறையினர் தெரிவித்துள்ளனர்.

குறித்த சம்பவம் தொடர்பாக கே.பி.அப்பன்னாவிடம் கருத்துக்களைக் கேட்டறிந்துள்ளதாகத் தெரிவித்துள்ள மும்பைக் காவல்துறையினர், எனினும் இன்னமும் உத்தியோகபூர்வமாக அப்பன்னாவிடம் விசாரணைகள் நடத்தப்படவில்லை எனத் தெரிவித்துள்ளனர். அத்தோடு குறித்த சம்பவம் இடம்பெற்ற அறைக்குள் கே.பி.அப்பன்னா சென்றாரா என்பதையும் உறுதிப்படுத்த முடியவில்லை எனவும் தெரிவித்துள்ளனர்.

ஹொட்டல் ஒன்றில் இடம்பெற்ற களியாட்ட நிகழ்வை அடுத்து அங்கு காணப்பட்ட ஒரு பெண்மணி மற்றும் அவரது வருங்காலக் கணவர் தங்கியிருந்த அறைக்குள் நுழைந்த லூக் பொமர்ஸ்பக், அப்பெண்மணியைப் பாலியல் ரீதியாகத் தொந்தரவு செய்ய முயன்றதோடு, அவரது வருங்காலக் கணவரைத் தாங்கியுள்ளதாகக் குற்றஞ்சாட்டப்பட்டுள்ளது.

தாக்கப்பட்ட அந்த நபர், சத்திரசிகிச்சைக்குள்ளாக்கப்பட வேண்டிய தேவை ஏற்பட்டதோடு சில நாட்கள் வைத்தியசாலையில் தங்கியிருக்க வேண்டியும் ஏற்பட்டது.

இதேவேளை, விசாரணைகளின் போது தான் மதுபோதையில் காணப்பட்டதை லூக் பொமர்ஸ்பக் ஒப்புக் கொண்டுள்ளதாகவும், அத்தோடு தன் சார்பில் பிழை காணப்படுவதையும் அவர் ஒப்புக் கொண்டுள்ளதாகவும் காவல்துறையினர் தெரிவித்துள்ளனர். (க்ரிஷ்)

Comments - 0

அன்புள்ள வாசகர்களே,
நீங்கள் தெரிவிக்கும் கருத்துகளுக்கு நிர்வாகம் எவ்விதத்திலும் பொறுப்பாகாது. அவை உங்களின் தனிப்பட்ட கருத்துகளாகும். உங்களின் கருத்துகள் ஆசிரியரின் தகுந்த தணிக்கைக்குப் பிறகே பதிவேற்றம் செய்யப்படும் என்பதைக் கவனத்திற்கொள்க. உங்கள் யோசனைகளையும் எங்களுக்கு அனுப்புங்கள். .