அம்மாவாகப் போகிறார் ஐஸ்வர்யா: அமிதாப் பச்சன் அறிவிப்பு

இந்தியாவின் முன்னிலை நடிகையும் முன்னாள் உலக அழகு ராணியுமான ஐஸ்வர்யா ராய் விரைவில் தாயாகப் போகிறார்.

ஐஸ்வர்யாவின் மாமனரான பொலிவூட் சுப்பர் ஸ்டார் அமிதாப் பச்சன் இத்தகவலை வெளியிட்டுள்ளார்.

நேற்று செவ்வாய்க்கிழமை ட்விட்டர் இணையத்தளம் மூலம் அமிதாப் பச்சன் விடுத்த செய்தியில் 'நான் தாத்தாவாகப் போகிறேன். ஐஸ்வர்யா கர்ப்பிணியாகவுள்ளார். நான் மிக மகிழ்ச்சியாகவும் த்ரில்லாகவும் உள்ளேன்' எனத் தெரிவித்துள்ளார்.

அமிதாப் பச்சனின் புதல்வர் அபிஷேக் பச்சனை (35) ஐஸ்வர்யா ராய் (37) திருமணம் செய்தபின் ஐஸ்வர்யாவின் எடை அதிகரிக்கும் போதெல்லாம் அவர் கர்ப்பமாக இருப்பதாக வதந்திகள் உலாவின. இப்போது உண்மையாகவே ஐஸ் அம்மாவாகப் போகிறார்.

பொலிவூட் பிரபலங்கள் பலர் ஐஸ்வர்யாவுக்கும் பச்சன் குடும்பத்தினருக்கும் வாழ்த்து தெரிவித்துள்ளனர்.

தற்போது தயாரிக்கப்படும் 'ஹீரோயின்' எனும் ஹிந்தித் திரைப்படத்தில் ஐஸ்வர்யா கதாநாயகியாக நடித்து வருகிறார்.

ஐஸ்வர்யா கர்ப்பமான செய்தியை சுமார் ஒரு மாதத்திற்கு முன்னரே அமிதாப் அறிந்திருந்தார் எனவும் ஆனால்,  சர்வதேச இந்திய திரைப்பட விழா  ( IIFA) பரபரப்பு உச்சத்தை அடையும் வேளையில் இத்தகவலை வெளியிடுவதற்காக அவர் காத்திருந்தார் எனவும் கூறப்படுகிறது.

சர்வதேச இந்திய திரைப்பட விழா இவ்வார இறுதியில் கனடாவின் டொரன்டோ நகரில் ஆரம்பமாகவுள்ளமை குறிப்பிடத்தக்கது.