‘மண்டோஸ்’ புயலால் முல்லைத்தீவில் 1,016 பேர் பாதிப்பு

செ. கீதாஞ்சன்

முல்லைத்தீவு மாவட்டத்தில், வியாழக்கிழமை (08) தொடக்கம் வௌ்ளிக்கிழமை (09) வரையில் ‘மண்டோஸ்’ புயலின் தாக்கத்தால் 311 குடும்பங்கள் பாதிக்கப்பட்டுள்ளதாக மாவட்ட செயலக புள்ளிவிவரத்தில் தெரிவிக்கப்பட்டுள்ளது.

புதுக்குடியிருப்பில் 82 குடும்பங்கள் பாதிக்கப்பட்டுள்ளதுடன் ஒரு வீடு முழுமையாக சோதமடைந்துள்ளதுடன் 39 வீடுகள் பகுதியளவில் பாதிக்கப்பட்டுள்ளன.

மாந்தை கிழக்கில் 67 பேர் பாதிக்கப்பட்டுள்ளதுடன் 21 வீடுகள் பகுதியளவில் சேதமடைந்துள்ளன. ஒட்டுசுட்டானில் 364 பேர் பாதிக்கப்பட்டுள்ளதுடன் 105 வீடுகள் பகுதியளவில் சேதமடைந்துள்ளன.

கரைதுறைப்பற்றில் 68 குடும்பங்களை சேர்ந்த 228 பேர் பாதிக்கப்பட்டுள்ளதுடன் 68 வீடுகள் பகுதியளவில் சேதமடைந்துள்ளன.துணுக்காயில் 43 பேர் பாதிக்கப்பட்டுள்ளதுடன் 14 வீடுகள் பகுதியளவில் சேதமடைந்துள்ளன. வெலிஓயாவில் 58 பேர் பாதிக்கப்பட்டுள்ளதுடன் 21 வீடுகள் பகுதியளவில் சேதமடைந்துள்ளன. 

வியாழக்கிழமை இரவு முல்லைத்தீவு மாவட்டத்தின் வெப்பநிலை 20 செல்சியஸ் வரை காணப்பட்டதுடன் கடும்குளிரால் ஆடுகள், மாடுகள் உயிரிழந்துள்ளன. சனிக்கிழமை (10) நண்பகல் வரை கிடைக்கப்பெற்ற தகவலுக்கு அமைய மாவட்டத்தில் 219 மாடுகள் உயிரிழந்துள்ளன. ஒட்டுசுட்டான் பிரதேசத்தில் 125 மாடுகளும் கரைதுறைப்பற்று பிரதேசத்தில் 27 மாடுகளும் புதுக்குடியிருப்பு பிரதேசத்தில் 55 மாடுகளும் துணுக்காய் பிரதேசத்தில் 12 மாடுகளும் உயிரிழந்துள்ளன. மாவட்டத்தில் 71 மாடுகள் பாதிக்கப்பட்டுள்ளன. 

கரைதுறைப்பற்று பிரதேசத்தில் 42 ஆடுகள் உயிரிழந்துள்ளதுடன் 37 ஆடுகள் பாதிக்கப்பட்டுள்ளன. துணுக்காய் பிரதேசத்தில் 6 ஆடுகள் உயிரிழந்துள்ளன.

கால்நடை பண்ணையாளர்கள் சரியான தகவல்களை வழங்காத காரணத்தால், சரியான புள்ளிவிவரங்கள் கிடைக்கவில்லை என அதிகாரிகள் தெரிவித்துள்ளதுடன் வௌ்ளிக்கிழமை  மின்சாரம் தடைப்பட்டு, தொலைபேசி இணைப்புகளும் துண்டிக்க்பபட்ட காரணத்தால் பல பண்ணையாளர்கள் இறந்த கால்நடைகளை புதைத்துள்ளார்கள்.