முதலாமிடத்துக்கு முன்னேறிய ஓமர்ஸாய்

சர்வதேச கிரிக்கெட் சபையின் ஒருநாள் சர்வதேசப் போட்டிகளுக்கான சகலதுறைவீரர்களுக்கான தரவரிசையில் முதலாமிடத்துக்கு ஆப்கானிஸ்தானின் அஸ்மதுல்லாஹ் ஓமர்ஸாய் முன்னேறியுள்ளார்.

இங்கிலாந்து, அவுஸ்திரேலியாவுக்கெதிரான சம்பியன்ஸ் கிண்ணப் போட்டிகளில் 108 ஓட்டங்களைப் பெற்றதுடன், 6 விக்கெட்டுகளைக் கைப்பற்றிய நிலையிலேயே மூன்றாமிடத்திலிருந்து இரண்டு இடங்கள் முன்னேறி முதலாமிடத்தை ஓமர்ஸாய் அடைந்துள்ளார்.

இதேவேளை இந்தியாவுக்கெதிரான சம்பியன்ஸ் கிண்ணப் போட்டியில் 28 ஓட்டங்களைப் பெற்றதுடன், ஒரு விக்கெட்டைக் கைப்பற்றிய நியூசிலாந்தின் மிற்செல் சான்ட்னெர், ஆறாமிடத்திலிருந்து ஓரிடம் முன்னேறி ஐந்தாமிடத்தையடைந்துள்ளார்.

முதல் ஐந்து சகலதுறைவீரர்களின் தரவரிசை பின்வருமாறு,

1. அஸ்மதுல்லாஹ் ஓமர்ஸாய், 2. மொஹமட் நபி, 3. சிகண்டர் ராசா, 4. மெஹிடி ஹஸன் மிராஸ், 5. மிற்செல் சான்ட்னெர்.

இந்நிலையில் தென்னாபிரிக்காவுக்கெதிரான சம்பியன்ஸ் கிண்ணப் போட்டியில் 64 ஓட்டங்களைப் பெற்ற தென்னாபிரிக்காவின் ஹெய்ன்றிச் கிளாசென்,  துடுப்பாட்டவீரர்களுக்கான தரவரிசையில் நான்காமிடத்திலிருந்து ஓரிடம் முன்னேறி மூன்றாமிடத்தையடைந்துள்ளார்.
இது தவிர, அவுஸ்திரேலியாவுக்கெதிரான சம்பியன்ஸ் கிண்ண அரையிறுதிப் போட்டியில் 84 ஓட்டங்களைப் பெற்ற இந்தியாவின் விராட் கோலி, ஐந்தாமிடத்திலிருந்து ஓரிடம் முன்னேறி நான்காமிடத்தையடைந்துள்ளார்.

இந்நிலையில் நியூசிலாந்துக்கெதிரான, அவுஸ்திரேலியாவுக்கெதிரான சம்பியன்ஸ் கிண்ணப் போட்டிகளில் 124 ஓட்டங்களைப் பெற்ற இந்தியாவின் ஷ்ரேயாஸ் ஐயர், ஒன்பதாமிடத்திலிருந்து ஓரிடம் முன்னேறி எட்டாமிடத்தையடைந்துள்ளார்.

இதேவேளை இங்கிலாந்துக்கெதிரான சம்பியன்ஸ் கிண்ணப் போட்டிகளில் 177 ஓட்டங்களைப் பெற்ற ஆப்கானிஸ்தானின் இப்ராஹிம் ஸட்ரான், 23ஆம் இடத்திலிருந்து 13 இடங்கள் முன்னேறி 10ஆம் இடத்தை அடைந்துள்ளார்.

முதல் 10 துடுப்பாட்டவீரர்களின் தரவரிசை பின்வருமாறு,

1. ஷுப்மன் கில், 2. பாபர் அஸாம், 3. ஹெய்ன்றிச் கிளாசென், 4. விராட் கோலி, 5. றோஹித் ஷர்மா, 6. ஹரி டெக்டர், 7. டரைல் மிற்செல், 8. ஷ்ரேயாஸ் ஐயர், 9. சரித் அசலங்க, 10. இப்ராஹிம் ஸட்ரான்.

இந்நிலையில் இங்கிலாந்துக்கெதிரான சம்பியன்ஸ் கிண்ணப் போட்டியில் 2 விக்கெட்டுகளைக் கைப்பற்றிய தென்னாபிரிக்காவின் கேஷவ் மஹராஜ், பந்துவீச்சாளர்களின் தரவரிசையில் நான்காமிடத்திலிருந்து இரண்டு இடங்கள் முன்னேறி இரண்டாமிடத்தையடைந்துள்ளார்.

இதேவேளை இந்தியாவுக்கெதிரான சம்பியன்ஸ் கிண்ணப் போட்டியில் 5 விக்கெட்டுகளைக் கைப்பற்றிய நியூசிலாந்தின் மற் ஹென்றி, ஆறாமிடத்திலிருந்து மூன்று இடங்கள் முன்னேறி  மூன்றாமிடத்தையடைந்துள்ளார்.

முதல் 10 பந்துவீச்சாளர்களின் தரவரிசை பின்வருமாறு,

1. மகேஷ் தீக்‌ஷன, 2. கேஷவ் மஹராஜ், 3. மற் ஹென்றி, 4. பெர்னார்ட் ஸ்கொல்ட்ஸ், 5. ரஷீட் கான், 6. குல்தீப் யாதவ், 7. குடகேஷ் மோட்டி, 8. மிற்செல் சான்ட்னெர், 9. ஷகீன் ஷா அஃப்ரிடி, 10. அடம் ஸாம்பா.