வெளிநாட்டு சிகரெட்டுகளுடன் வந்தவர் சிக்கினார்

வெளிநாட்டில் தயாரிக்கப்பட்ட 4,50 000 ரூபாய் பெறுமதியுடைய  சிகரெட்டுகளை சட்டவிரோதமாக நாட்டிற்குள் கொண்டு வந்து, கட்டுநாயக்க விமான நிலையத்திலிருந்து வெளியேற முயன்ற ஒருவர் செவ்வாய்க்கிழமை (18) அன்று கைது செய்யப்பட்டுள்ளார்.    

 நாவற்காடு பகுதியைச் சேர்ந்த 21 வயது இளைஞனே இவ்வாறு கைது செய்யப்பட்டுள்ளார்.  

குறித்த நபர்  இந்த சிகரெட்டுகளுடன் துபாயிலிருந்து  குவைத் நாட்டிற்கு சென்று , அங்கிருந்து செவ்வாய்க்கிழமை (18)  அதிகாலை 03.40 மணியளவில்  ஜசீரா ஏர்வேஸ் விமானம் J.-9551 மூலம் கட்டுநாயக்க விமான நிலையத்தை வந்தடைந்துள்ளார்.

அவரின் பயணப் பையை சோதனைக்கு உட்படுத்திய போது வெளிநாட்டில் தயாரிக்கப்பட்ட 27,000 "மான்செஸ்டர்" சிகரெட்டுகள் அடங்கிய 135  அட்டைப்பெட்டிகள் கைப்பற்றப்பட்டுள்ளது.

சந்தேக நபர்  பொலிஸ் பிணையில் விடுவிக்கப்பட்டுள்ளதுடன் புதன்கிழமை (19) அன்று நீர்கொழும்பு நீதவான் நீதிமன்றத்தில் ஆஜர்படுத்தப்பட உள்ளார்.ஷ

 டீ.கே.ஜி கபில