மாணவர்களின் பாதுகாப்பை உறுதிப்படுத்துமாறு பேரணி

ரீ.கே.றஹ்மத்துல்லா, எம்.எஸ்.எம். ஹனீபா

பல்கலைக்கழத்தில் தரமான கல்வியை நிலைநாட்டி, மாணவர்களின் பாதுகாப்பை உறுதி செய்யுமாறு கோரி, தென்கிழக்குப் பல்கலைக்கழக மாணவர்கள், பல்கலைக்கழக வளாகத்தினுள் இன்று (14) விழிப்புணர்வு பேரணியொன்றை நடத்தினர்.

பல்கலைக்கழக மாணவர் பேரவையால் ஏற்பாடு செய்யப்பட்ட இவ்விழிப்புணர்வு பேரணியில் பெருந்திரளான மாணவர்கள் அரபு, இஸ்லாமிய பீடத்திலிருந்து பதாதைகளை ஏந்தியவண்ணம், கோஷமிட்டவாறு, பல்கலைக்கழகத்தின் நிர்வாகக் கட்டடத்தொகுதி வரை சென்றனர்.

தமது கோரிக்கைகள் அடங்கிய மகஜரை, பல்கலைக்கழத்தின் நிர்வாகத்தினரிடம் கையளித்து வைத்தனர்.

மாணவிகளுக்கு எதிரான வன்முறைகள், அச்சுறுத்தல்களுக்கு நிர்வாகம் மௌனம் காக்காது, உடனடி நடவடிக்கையை விரைவாக நிறைவேற்றுமாறும், முறையற்ற வித்தில் செயற்படும் அதிகாரிகளை கண்டிக்குமாறும், தமது கோரிக்கையை மாணவர்கள் முன்வைத்துள்ளனர்.

இதேவேளை, விடுதியின் சுகாதாரம், பாதுகாப்பு மற்றும் வசதிகளை மேம்படுத்துமாறும், பல்கலைக்கழக மாணவர்களுக்கு அரசாங்கம் வழங்கும் சலுகைகளைச் சுரண்டாது சீராகப் பெற்றுக் கொடுக்க நடவடிக்கை மேற்கொள்ளுமாறும் பேரணியில் ஈடுபட்ட மாணவர்களால் வலிறுத்தப்பட்டன.