Yarl IT Hubஇன் 2016ஆம் ஆண்டுக்கான முதலாவது ஒன்று கூடல்

யாழ்ப்பாணத்தை அடுத்த சிலிக்கன் பள்ளத்தாக்காக மாற்றும் நோக்கத்துடன் ஆரம்பிக்கப்பட்ட இலாப நோக்கமற்ற அமைப்பான Yarl IT Hubப்பானது சிறந்த கணினித் தொடர்பாடல் திறமைகள், படைப்பாற்றலினூடாக புதிய கண்டுபிடிப்புக்களை வழங்கும் இளம் தொழில்நுட்பவல்லுநர்களை அடையாளங்காணும் போட்டி நிகழ்ச்சியான Yarl Geek Challenge-இனை வெற்றிகரமாக நடாத்தி வருகின்ற நிலையில், வட மாகாணத்தின் எதிர்கால தகவல் தொழில்நுட்பத்துறையினரை இலக்காகக் கொண்டு, 2016ஆம் ஆண்டுக்கான Yarl IT Hub இன் முதலாவது ஒன்றுகூடலானது Yarl IT Hub-இன் புதிய தலைமுறையினால் ஒழுங்கு செய்யப்பட்டுள்ளது.

மேற்படி ஒன்றுகூடலானது, எதிர்வரும் ஞாயிற்றுக்கிழமை (21), நல்லூரிலுள்ள தியாகிகள் அறக்கொடை நிறுவன மண்டபத்தில், காலை 9.30மணியிலிருந்து நண்பகல் 12 மணிவரை இடம்பெறவுள்ளது. இதில் கலந்து கொள்வதற்காக, tinyural.com/yitmeetup என்ற இணைய முகவரிக்குச் சென்று பதிவுகளை மேற்கொள்ள முடியும் என்பதோடு, இது தொடர்பான மேலதிக தகவல்களுக்கு 075 0395 802 என்ற அலைபேசி இலக்கத்தில் மில்லர் என்ற நபரை தொடர்புகொள்ள முடியும் என்று தெரிவிக்கப்பட்டுள்ளது.  

தகவல் தொடர்பாடல் துறையில் உள்ள இளம் மாணவர்களை சமுகத்திற்க்கு பயன்படும் வகையில் சிந்திக்கவும் மிகவும் போட்டிகரமான இத்துறையில் பிரகாசிப்பதற்க்கு தேவையான மென் திறன்களை அடையாளப்படுத்தலுமே மேற்படி ஒன்றுகூடலின் இந்நிகழ்வின் முக்கியமான நோக்கமாக காணப்படுகிறது. தவிர, Yarl IT Hub இன் வழமையான நிகழ்வுகளில் முன்வைக்கப்படும், எமது இளம் தலைமுறையினரை தகவல் தொடர்பாடலுடன் தொடர்புடைய முயற்சியாண்மைகளுக்கு ஊக்கப்படுத்தல் எனும் தொனிப்பொருளும் அன்று முன்வைக்கப்படும் எனத் தெரிவிக்கப்பட்டுள்ளது.   

இவ்வொன்றுகூடலானது, குறிப்பாக  தகவல் தொடர்பாடல் துறையில் ஆர்வம் உள்ள மாணவர்களுக்கு இத்துறையில் கோலூன்ற ஒரு தளமாக அமையும் என்கின்ற நிலையில், அன்றைய ஒன்றுகூடலில் அண்மையில் வெளியாகிய க.பொ.த உயர்தரப் பரிட்சையில் தகவல் தொடர்பாடல் துறையில் மாவட்டத்தில் முதலிடம் பெற்ற ஞானகீதனின் உரை, 2014ஆம் ஆண்டிற்கான கூகிள் நிறுவனத்திற்கான இலங்கையின் மாணவ பிரதிநிதியாக தெரிவான அழகரசன் மஹாலிங்கம் அவர்களின் ஆளுமை திறன், மென்திறன் வளர்ச்சி தொடர்பான உரையும் உள்ளடக்கப்பட்டுள்ளது. தவிர, புத்தாக்கங்களுக்கான சிந்தனையை வளர்த்துக்கொள்ளும் முகமாக  பங்கேற்பாளர்களுடனான கலந்துரையாடல் நிகழ்வும் இடம்பெறவுள்ளது.