செப்டெம்பரில் போட்டிகளில் பங்குபற்ற எதிர்பார்க்கிறேன்: யுவ்ராஜ் சிங்

A.P.Mathan / 2012 மே 17 , பி.ப. 02:50 - 0 - {{hitsCtrl.values.hits}}

புற்றுநோய் காரணமாக கிரிக்கெட் போட்டிகளிலிருந்து விலகிக் காணப்படும் இந்திய அணியின் சகலதுறை வீரர் யுவ்ராஜ் சிங், எதிர்வரும் செப்டெம்பர் மாதத்திலிருந்து கிரிக்கெட் போட்டிகளிலும் பங்குபற்ற எதிர்பார்ப்பதாகத் தெரிவித்துள்ளார். கடந்தாண்டு இடம்பெற்ற உலகக் கிண்ணத்தை இந்திய அணி வெற்றிகொள்வதற்காக யுவ்ராஜ் சிங் ஆற்றிய சேவைகளுக்கு நன்றி தெரிவித்து இடம்பெற்ற பாராட்டு விழாவிலேயே அவர் இவ்வாறு தெரிவித்துள்ளார்.

பஞ்சாப் கிரிக்கெட் அமைப்பினால் நடாத்தப்பட்ட இந்தக் கௌரவிப்பு நிகழ்வில், பஞ்சாப்பின் முதலமைச்சர் மற்றும் நாடாளுமன்ற உறுப்பினர் ஒருவரும் கலந்து கொண்டனர். இந்தப் பாராட்டு நிகழ்வில் யுவ்ராஜ் சிங்கிற்கு 1 கோடி இந்திய ரூபாய்கள் பெறுமதியான பணப்பரிசிலும் வழங்கிக் கௌரவிக்கப்பட்டது.

ஒரு வருடத்திற்குள் கிரிக்கெட் போட்டிகளில் பங்குபற்றக்கூடியதாக அமையுமா எனக் கேட்கப்பட்டதற்கு, ஒரு வருடம் என்பது மிக நீளமானது எனத் தெரிவித்த அவர், 3 அல்லது 4 மாதங்களுக்குள் கிரிக்கெட் போட்டிகளில் மீளப் பங்குபற்ற ஆரம்பிக்க முடியும் என எண்ணுவதாகத் தெரிவித்துள்ளார்.

முதலமைச்சரால் கௌரவிக்கப்படுவது சிறந்த உணர்வைத் தருவதாகத் தெரிவித்த அவர், பஞ்சாபைச் சேர்ந்த ஒருவராக உலகக்கிண்ண வெற்றியில் பங்கெடுத்துக் கொண்டமை குறித்து மகிழ்ச்சியடைவதாகவும், உலகக்கிண்ணத்தை வெற்றிகொள்வது அனைவரதும் கனவாகக் காணப்பட்டதாகவும், 28 வருடங்களுக்குப் பின் உலகக்கிண்ணம் நாட்டுக்குத் திரும்பக் கொண்டுவரப்பட்டது மகிழ்ச்சிகரமானது எனவும் தெரிவித்தார்.

கடந்தாண்டு உலகக்கிண்ணத்தை இந்திய அணி வெற்றிகொள்வதற்கு முக்கிய காரணமாக அமைந்த யுவ்ராஜ் சிங், இந்திய அணி சார்பாக துடுப்பாட்டம், பந்துவீச்சு இரண்டிலும் பிரகாசித்திருந்ததோடு, தொடரின் நாயகனாகவும் தெரிவாகியிருந்தமை குறிப்பிடத்தக்கது. (க்ரிஷ்)

Comments - 0

அன்புள்ள வாசகர்களே,
நீங்கள் தெரிவிக்கும் கருத்துகளுக்கு நிர்வாகம் எவ்விதத்திலும் பொறுப்பாகாது. அவை உங்களின் தனிப்பட்ட கருத்துகளாகும். உங்களின் கருத்துகள் ஆசிரியரின் தகுந்த தணிக்கைக்குப் பிறகே பதிவேற்றம் செய்யப்படும் என்பதைக் கவனத்திற்கொள்க. உங்கள் யோசனைகளையும் எங்களுக்கு அனுப்புங்கள். .