டிக்டொக்கில் மிரட்டிய ஆவா உறுப்பினர்கள் கைது

அச்சுறுத்தல் மற்றும் தாக்குதல் சம்பவங்களுடன் தொடர்புடைய, யாழ்ப்பாணத்தை மையமாகக் கொண்ட பிரபல 'ஆவா' கும்பலைச் சேர்ந்த இருவர் உட்பட நான்கு சந்தேக நபர்கள் மட்டக்குளி பகுதியில் கைது செய்யப்பட்டுள்ளனர். 

கடத்தல் சம்பவம் இடம்பெறுவதற்கான சாத்தியம் குறித்து தனி நபர் ஒருவரிடமிருந்து பொலிஸாருக்கு கிடைத்த இரகசிய தகவலையடுத்து இவர்கள் கைது செய்யப்பட்டுள்ளனர்.

மட்டக்குளிய வீதியில் வைத்து சந்தேகநபர்கள் கைது செய்யப்பட்டுள்ளதாக பொலிஸார் தெரிவித்தனர்.

ஈச்சிலம்பட்டை மற்றும் தோப்பூரைச் சேர்ந்த சந்தேக நபர்கள் இருவரும் விசாரணையின் போது, வடகிழக்கில் குற்றச் செயல்களில் ஈடுபடும் 'ஆவா' கும்பலுடன் தொடர்புடையவர்கள் என்பது தெரியவந்துள்ளது.

ஏனைய இரு சந்தேகநபர்களும் அண்மையில் டுபாயில் இருந்து இலங்கைக்கு வருகை தந்திருந்த நிலையில், திருகோணமலையில் இருந்து மட்டக்குளிக்கு 'ஆவா' கும்பல் உறுப்பினர்களை அழைத்து வருமாறு டுபாயில் வசிக்கும் நபர் ஒருவரினால் அறிவுறுத்தப்பட்டுள்ளனர். 

குறித்த சந்தேக நபர்கள் துபாயில் இருந்த நபரை டிக்டோக் மூலம் மிரட்டியதும் தெரியவந்தது.

இவர்களது தொலைபேசிகள் தொடர்பில் மேற்கொள்ளப்பட்ட மேலதிக விசாரணைகளின் போது, ​​'ஆவா' கும்பலைச் சேர்ந்த இருவரையும் பெண் ஒருவரால் மட்டக்குளிக்கு அழைத்து வந்ததாகவும், பின்னர் அவர்கள் தாக்கப்பட்டு, டுபாயில் உள்ள நபருக்கு அனுப்புவதற்காக வீடியோ படம்பிடிக்கப்பட்டதாகவும் தெரியவந்துள்ளது.

சந்தேகநபர்கள் 24, 26, 27 மற்றும் 32 வயதுடைய புதுக்குடியிருப்பு, கொட்டாஞ்சேனை, ஈச்சிலம்பட்டை மற்றும் தோப்பூர் ஆகிய பகுதிகளைச் சேர்ந்தவர்கள் என அடையாளம் காணப்பட்டுள்ளனர்.

சம்பவம் தொடர்பில் மட்டக்குளி பொலிஸார் தொடர்ந்தும் விசாரணைகளை மேற்கொண்டு வருகின்றனர்.